Ön söz
Əziz oxucular,
”Məhkəməyə müraciət qaydaları” kitabçasının əsas məqsədi sizi məhkəməyə müraciətlə bağlı zəruri məlumatlarla təmin etməkdir.
Azərbaycan Respublikasının Konstitusiyası hər kəsin öz hüquq və azadlıqlarını məhkəmələrdə müdafiə etməsinə zəmanət verir. Konstitusiyanın 60-cı maddəsinə əsasən:
I. Hər kəsin hüquq və azadlıqlarının məhkəmədə müdafiəsinə təminat verilir.
II. Hər kəs dövlət orqanlarının, siyasi partiyaların, həmkarlar ittifaqlarının və digər ictimai birliklərin, vəzifəli şəxslərin qərar və hərəkətlərindən yaxud hərəkətsizliyindən məhkəməyə şikayət edə bilər.
Bu məlumat kitabçası məhkəməyə müraciət prosesində sizə bələdçilik etmək üçün hazırlanıb. Siz Azərbaycanın məhkəmə sistemi, birinci instansiya məhkəməsinə müraciət qaydaları, işin mahiyyətindən asılı olaraq icraat növləri və mülki iddia ilə məhkəməyə müraciət edərkən nümayəndə,qanuni nümayəndə,vəkil məsləhətinin mühüm rolu ilə tanış olacaqsınız. Məlumat kitabçası həmçinin, birinci instansiya məhkəməsinin qərarından narazı qaldığınız və bununla əlaqədar növbəti məhkəmə instansiyalarına, yəni apellyasiya məhkəmələrinə və Azərbaycan Respublikası Ali Məhkəməsinə müraciət etmək istədiyiniz halda hansı addımları atmalı olduğunuza aydınlıq gətirir. Kitabçada bunlarla yanaşı Konstitusiya Məhkəməsinə fərdi şikayətlərin verilməsi qaydaları da izah edilib.
Azərbaycan 25 yanvar 2001-ci ildən Avropa Şurasının üzvüdür. Avropa İnsan Hüquqları Konvensiyası Azərbaycana münasibətdə 15 aprel 2002-ci ildə qüvvəyə minib. Bu tarixdən Konvensiyanın 34 maddəsinə əsasən Avropa İnsan Hüquqları Məhkəməsinə müraciət hüququ yaranmışdır. Məlumat kitabçasında həmçinin, Avropa Məhkəməsinə müraciət qaydaları qısa şəkildə təsvir olunub.
Məlumat kitabçasının sonuncu bölməsi ATƏT-in Bakı Ofisinin dəstəyi ilə Sumqayıt, Gəncə və Lənkəran şəhərlərində yaradılmış Hüquq Resurs Mərkəzlərinə həsr edilmişdir. Bu Mərkəzlərdə əhaliyə pulsuz hüquqi yardım göstərilir və təlim proqramları həyata keçirilir. 2010-ci ilin əvvəlində daha bir Mərkəz isə Şəki şəhərində fəaliyyətə başlayacaq.
Ümid edirik ki, ”Məhkəməyə müraciət qaydaları” kitabçası sizin üçün faydalı olacaq.
Kitabça ilə bağlı sual və təkliflərinizi ATƏT-in Bakı Ofisinə ünvanlaya bilərsiniz.
ATƏT-in Bakı Ofisi
Qanunun Aliliyi və İnsan Hüquqları Şöbəsi
