Bazar
ertəsi, 12 Dekabr 2011
İslam Partiyası sədrinin
müavini Vaqif Abdullayev Penitensiar Xidmətin Mərkəzi Müalicə Müəssisəsində
müalicəsini davam etdirir. Məhbus islamçının ailəsindən "Media forum” saytına
bildiriblər ki, onlar Vaqif Abdullayevin səhhəti haqda yanız vəkildən məlumat
ala bilirlər.
Dekabrın 8-də ailə görüş üçün
hazırda islamçıların şikayətinə baxan Bakı Apellyasiya Məhkəməsinin hakimi
Həsən Əhmədova rəsmi müraciət edib. Hakim məhkəmə prosesi getdiyini əsas
gətirərək ailəyə görüş icazəsi verməyib.
Hazırda ailənin Vaqif Abdullayev
barəsində aldığı məlumat onun səhhətinin nisbətən yaxşı olması, müalicənin
normal davam etməsindən ibarətdir: "Təxminən 10-13 il əvvəl o, infarkt
keçirmişdi. Eyni zamanda astma xəstəliyinə meyllidir. Heç vaxt siqaret
çəkməyib. Ola bilər ki, son günlərin hadisələri və bronxlarındakı problem
üst-üstə düşüb və nəticədə bu cür xəstələnib”.
Vaqif Abdullayev mikro
infarkt diaqnozu ilə bu il dekabrın 2-də Bakı İstintaq Təcridxanasından
Penitensiar Xidmətin Mərkəzi Müalicə Müəssisəsinə gətirilib.
Oktyabrın 7-də Bakı Ağır
Cinayətlər Məhkəməsi Vaqif Abdullayevi 11 il müddətinə azadlıqdan məhrum edib.
Hazırda bu hökmdən verilən apellyasiya şikayətinə baxılır.
Vaqif Abdullayev Cinayət
Məcəlləsinin 214.2.1 (Qabaqcadan əlbir olan bir qrup şəxs, mütəşəkkil dəstə və
ya cinayətkar birlik (cinayətkar təşkilat) tərəfindən cinayətə hazırlıq);
214.2.3 (Odlu silahdan və silah qismində istifadə olunan predmetlərdən istifadə
etməklə cinayətə hazırlıq); 228.3 (Qanunsuz olaraq odlu silah, onun komplekt
hissələrini, döyüş sursatı (yivsiz odlu ov silahı və həmin silah üçün döyüş
sursatı istisna olmaqla), partlayıcı maddələr və qurğular əldə etmə, başqasına
vermə, satma, saxlama, daşıma və ya gəzdirmə); 278-ci (Hakimiyyəti zorla ələ
keçirmə və ya onu zorla saxlama) maddələri ilə təqsirli bilinib.
http://hicab.org/?p=5689
|