Azərbaycan Respublikasının İnsan Hüquqları üzrə Müvəkkili Elmira
Süleymanovanın tapşırığına əsasən, Ombudsman Aparatının
əməkdaşları Ədliyyə Nazirliyi Penitensiar Xidmətinin 12 saylı və
14 saylı cəzaçəkmə müəssisələrində olub, Müvəkkilə müraciət edən
məhkumlarla görüşüblər.
Ombudsman Aparatının mətbuat xidmətindən APA-ya verilən məlumata
görə, görüş zamanı Ombudsmanın nümayəndələri saxlanılma şəraiti,
məhkumların səhhəti və onlara qarşı rəftarla bağlı mövcud
vəziyyəti öyrəniblər.
Araşdırma zamanı 14 saylı müəssisədə aparılmış kadr islahatından
sonra bir sıra müsbət işlər görüldüyü, belə ki, məhkumların
ailələri ilə telefon danışığı üçün nəzərdə tutulmuş xətlərin
sayının 2-dən 4-ə çatdırıldığı, qısa müddətli görüş otağının və
asudə vaxtın səmərəli keçirilməsi üçün klubun təmir edildiyi,
içməli su xəttinin təzələnməsi və inzibati binada təmir işlərinin
yekunlaşdırıldığı məlum olub.
Qəbul edilən məhkumlara hüquqi məsləhətlər verilib, Ombudsmanın
səlahiyyətləri və cəzaçəkmə müəssisəsinin daxili intizam qaydaları
izah edilib. Saxlanılma şəraitinin daha da təkmilləşdirilməsi ilə
bağlı hər iki müəssisə rəhbərinə müvafiq tövsiyələr verilib.
Saytdakı materialların istifadəsi zamanı istinad edilməsi
vacibdir. Məlumat
internet səhifələrində istifadə edildikdə hiperlink vasitəsi ilə
istinad mütləqdir.
