Главная » 2012 » Май » 6 » Ömürlük məhbus niyə intihar etdi?
01:06
Ömürlük məhbus niyə intihar etdi?
Azadlıq, 28 FEBRUARY 2012 10:05
Emin Qədirov karserə salınanda «intihar edəcəm» xəbərdarlığını etsə də...
Ədliyyə Nazirliyi Penitensiar Xidmətin Qobustan həbsxanasında intihar
hadisəsi baş verib. Qaradağ Rayon Prokurorluğundan verilən xəbərə görə,
həbsxanada saxlanılan 53 yaşlı Emin Qədirov özünü kamerada asaraq
intihar edib.
Onun Cinayət Məcəlləsinin 120-ci (qəsdən adam öldürmə) maddəsinin
müxtəlif bəndləri ilə təqsirləndirilərək, ömürlük azadlıqdan məhrum
edildiyi bildirilir. Hazırda faktla bağlı Qaradağ Rayon Prokurorluğunda
araşdırma aparılır.
Ədliyyə Nazirliyi Penitensiar Xidmətindən isə qurumun bu cür xəbərlərə şərh vermədiyi bildirilib.
Qeyd edək ki, Azərbaycanın Avropa Şurasına üzv olması ilə əlaqədar ölüm
hökmü qanunvericilikdən çıxarıldıqdan sonra 1998-ci ildə ölüm hökmü
altında olan məhbusların cəzaları Milli Məclisin qəbul etdiyi qərarla
ömürlük həbs cəzası ilə əvəzlənib. Ermənistan və Gürcüstanda
belələrinin cəzaları 15 illə əvəzlənib. Azərbaycanda isə yalnız bir
nəfərin cəzası ölkə başçısının əfv fərmanı ilə 20 ilə endirilib.
Emin Qədirov 21 il idi ki, məhbus həyatı yaşayırdı. Azadlığa çıxmaq
üçün Ilham Əliyevə dəfələrlə əfv ərizəsi ilə müraciət etsə də, heç bir
nəticəsi olmamışdı.
"Azadlıq”a daxil olan məlumata görə, intihar edən gün isə onu karserə
salıblar. Məhbus buna dözə bilməyəcəyini, ora gedəcəyi təqdirdə intihar
edəcəyini deyib. "Cəhənnəmə intihar elə!” cavabını eşidib və karserə
salınıb. Bu cavabdan sonra Emin Qədirov intihara əl atıb. Daxil olan
məlumatda o da vurğulanır ki, Emin Qədirov ölkə başçısına etdiyi
müraciətlərinə görə dəfələrlə təzyiqlərə məruz qalıb. Hətta bir dəfə
vəhşicəsinə döyülüb.
Məlumatı verən şəxs deyir ki, ölüm hökmü ömürlük həbs cəzası ilə
əvəzlənən zaman 127 məhbus olub. Hazırda Qobustan həbsxanasında 76
nəfər cəza çəkir.
