Главная » 2012 » Апрель » 5 » 40 məhkum cəzalarının qalan hissəsini çəkmək üçün Azərbaycana gətirilib
12:59
40 məhkum cəzalarının qalan hissəsini çəkmək üçün Azərbaycana gətirilib
Bu il indiyədək ayrı-ayrı ölkələrdə cəza çəkən 40 məhkum cəzalarının
qalan hissəsini çəkmək üçün Azərbaycana gətirilib.
Ədliyyə Nazirliyinin Beynəlxalq Əməkdaşlıq İdarəsinin rəisi Zavər Qafarov
çərşənbə günü Trend-ə bildirib ki, məhkumlardan 32-si Rusiyadan, 5-i
Gürcüstandan, 1-i Qazaxıstandan, 1-i Ukraynadan, 1-i isə İrandan gətirilib.
Həmçinin Azərbaycandan cəza çəkmək üçün vətəndaşı olduqları ölkəyə 28 məhkum
təhvil verilib. Onlardan25-i İrana, 2-si Rusiyaya, 1-i isə Gürcüstana təhvil verilib.
Qafarov bildirib ki, hazırda Azərbaycanın cəzaçəkmə müəssisələrində 600-ə qədər
əcnəbi məhkum cəza çəkir.
Onların böyük qismi Gürcüstan, İran və Rusiya vətəndaşlarıdır.
İrandan olan məhkumların əksəriyyəti narkotik vasitələrin qanunsuz dövriyyəsi,
Gürcüstandan olanlar isə oğurluq, quldurluq və soyğunçuluq cinayətlərinə görə
məhkum olunanlardır.
Nazirlik rəsmisi bildirib ki, Azərbaycanla Gürcüstan arasında bu sahədə mövcud
problemlərin həlli məqsədilə iki ölkənin ədliyyə nazirləri və nazirliklərinin
nümayəndə heyətləri arasında keçirilən görüşlərdə bu məsələlər müzakirə olunub.
Bunun nəticəsində Gürcüstanda cəza çəkən bir neçə vətəndaşımıza dair sənədlər
təqdim edilib və artıq 5 vətəndaşımız cəza çəkmək üçün ölkəmizə təhvil verilib.
İdarə rəisi bildirib ki, Azərbaycan və Çin arasında məhkumların cəza çəkmək
üçün verilməsi haqqında müqavilənin olmamasına baxmayaraq, qarşılıqlıq prinsipi
əsas götürülərək Çində cəza çəkən 4 nəfər Azərbaycana gətirilib.
Onun sözlərinə görə, hazırda Çində cəza çəkən bir neçə Azərbaycan vətəndaşının
verilməsi üçün diplomatik kanallarla danışıqlar davam etdirilir.
Qafarov bildirib ki, ilin sonuna qədər Azərbaycanda cəza çəkən 15 məhkumun
cəzasının qalan hissəsini çəkməsi üçün İrana verilməsi və bu ölkədə cəza çəkən
bir neçə Azərbaycan vətəndaşının ölkəyə gətirilməsi ilə bağlı danışıqlar
aparılır.
İranda 20-yə yaxın, Rusiyada isə daha çox Azərbaycan vətəndaşı cəza çəkir.
İdarə rəisi deyib ki, onların da Azərbaycana verilməsi üçün danışıqlar
aparılır. Rusiyada cəza çəkən 3, Gürcüstanda cəza çəkən 5 nəfərin isə ilin
sonunadək Azərbaycana gətirilməsi planlaşdırılır və bu barədə razılıq əldə
olunub.
Qafarov bildirib ki, Türkiyənin ədliyyə nazirinin Azərbaycana son səfərindən
sonra burda cəza çəkən türkiyəli məhkumların öz ölkələrinə verilməsi üçün
ədliyyə naziri cənab Fikrət Məmmədov tərəfindən göstəriş verilib və hazırda bu
iş davam etdirilir.
Yaxın vaxtlarda iki ölkə arasında hüquqi yardım və əməkdaşlıqla bağlı Ankarada
ekspertlər səviyyəsində görüşün keçirilməsi nəzərdə tutulur.
İdarə rəisi Pakistanla da məhkumların verilməsi ilə bağlı sənədin
razılaşdırılacağını və bu istiqamətdə iş aparıldığını deyib.