Главная » 2012 » Апрель » 7 » Ədliyyə Nazirliyindən QHT-lərə dəvət: İctimai Komitənin yeni tərkibinin formalaşdırılmasında iştirak edin
06:23
Ədliyyə Nazirliyindən QHT-lərə dəvət: İctimai Komitənin yeni tərkibinin formalaşdırılmasında iştirak edin
Yerləşdirilib:22.12.11
Ədliyyə naziri yanında İctimai Komitənin yeni tərkibi formalaşdırılacaq.
Ədliyyə Nazirliyindən verilən məlumata görə, məhkumların islah edilməsində və penitensiar müəssisələrin fəaliyyətinə ictimai nəzarətin həyata keçirilməsində ictimaiyyətin iştirakını təmin edən İctimai Komitənin bir illik səlahiyyət müddəti gələn il yanvarın 18-də başa catır.
İctimai Komitənin yeni tərkibinin formalaşdırılması ədliyyə nazirinin 2006-cı il 25 aprel tarixli Komitənin fəaliyyətini tənzimləyən əmri ilə təsdiq edilərək dövlət qeydiyyatına alınmış qaydalara əsasən həyata keçirilir.
Qaydalara müvafiq olaraq, Ədliyyə Nazirliyi Kollegiyasının qərarı ilə tərkibi aidiyyəti dövlət, habelə qeyri-hökumət təşkilatlarının nüfuzlu nümayəndələrindən, ictimai xadimlərdən ibarət olan Seçki Komissiyası tərəfindən İctimai Komitə üzvlərinin fəaliyyəti təhlil edilərək qiymətləndirilir, namizədlər arasında seçim aparılır.
Nazirlik bununla əlaqədar müvafiq sahədə fəaliyyət göstərən qeyri-hökumət təşkilatlarının və hüquq müdafiəçilərini yeni tərkibin formalaşdırılmasında iştiraka dəvət edir. İctimai Komitənin fəaliyyətində iştirak etmək istəyənlər öz proqram və təklifləri ilə Ədliyyə Nazirliyinə - Seçki Komissiyasına müraciət edə bilərlər. Müraciətə namizədin ərizəsi, onun barəsində ətraflı məlumat, o cümlədən əmək fəaliyyətini, təhsilini xarakterizə edən sənədlər əlavə edilməlidir.