“Ağır xəstə olan məhbuslar azad edilsə yaxşı olar”
Ədliyyə Nazirliyinin Müalicə Müəssisəsində ömürlük həbs cəzasına məhkum olunmuş Ağayev Coşqun Həqiqət oğlu dünyasını dəyişib. Bu barədə AZXEBER.com-a İnsan Haqları Mərkəzindən (İHM) daxil olan məlumatda bildirilir. Qeyd olunur ki, 1993-cü ildə məhkəmədə barəsində ölüm hökmü çıxarılmış ağır cinayətlərdə ittiham olunan 1969-cu il doğumlu A.Coşqunun ölümünə səbəb boğazında xərçəng xəstəliyinin olması olub.
Qeyd edək ki, A.Coşqun 3,5 il Bayıl türməsində ölüm hökmü alan məhbuslarla birlikdə saxlanılıb. Oradan isə 1994-cü il noyabrın 1-də 10 nəfər ömürlük məhbusun etdiyi məşhur qaçışın iştirakçılarından biri olub. Qaçışdan sonra A.Coşqun həbs olunub. İHM-in məlumatında qeyd olunur ki, A.Coşqun həbsdən sonra işgəncələrə məruz qalıb, bu isə onun səhhətinə pis təsir edib.
1998-ci ildə Azərbaycanda ölüm hökmü ləğv ediləndə A.Coşqunun barəsində seçilmiş hökm dəyişidirilib və cəza ömürlük azadlıqdan məhrum etmə ilə əvəzlənib. Bundan sonra məhbus barəsində seçilmiş qərarın dəyişdirilməsi ilə bağlı yenidən məhkəməyə müraciət edib. 2007-ci ildə isə o, analoji məqsədlə Avropa Məhkəməsinə müraciət edib. İHM sədri E.Zeynalov faktla bağlı bildirib ki, ağır xəstə olan məhkumların tibb müəssisələrində ölməsi faktları bir daha ağır xəstə olan cəza çəkən şəxslərin azadlığa buraxılması məsələsini gündəmə gətirir: “Zaman-zaman praktikada tətbiq olunan bu hal yenidən bir daha müzakirəyə çıxarılsa və həddən artıq agır xəstə olan məhbuslar azad edilsə yaxşı olar. Çünki bu insanların ömürlərinin son günlərini cəzaçəkmə müəssisələrində deyil, evlərində keçirmələri doğru olardı”. Azxeber.com http://www.azxeber.com/news/76137
