ÇƏRŞƏNBƏ AXŞAMI, 20 YANVAR 2015 09:34
Yaxınları məsələ ilə bağlı ölkə başçısına müraciət etdi 14 saylı cəzaçəkmə müəssisəsində baş verənlərə görə Vərəmli Məhkumlar üçün Müalicə Müəssisinə -"tubzon"a köçürülən məhkumların yaxınlarına onlarla görüşə icazə verilmir. Bu barədə “Azadlıq”a məhkumların yaxınları məlumat verib: “Bu gün (dünən - red) getdik, əvvəlcə görüşə icazə verəcəklərini dedilər. Lakin sonradan bəlli oldu ki, guya onlar ”kars"da döşəkağını cırdıqlarına görə, daha ağır cəzaya məhkum olunublar. Dedilər ki, ayda bir dəfə görüşə icazə verilə bilər". Lakin məhkumların yaxınları hesab edir ki, onlar yenidən işgəncəyə məruz qalıblar: “Görünür, xəsarət izləri var. Ona görə də bizimlə görüşə icazə vermirlər”. Məhkumların yaxınları bildirir ki, məsələ ilə bağlı Ombudsmana, QHT nümayəndələrinə müraciət etsələr də, heç bir nəticəsi olmayıb: “Ona görə də biz ölkə başçısına müraciət edirik. Ondan xahiş edirik ki, bu məsələni diqqətdə saxlasın”. Xatırldadaq ki, dekabrın 22-də 14 saylı cəzaçəkmə müəssisəsində məhkumlar qiyama qalxıb. Buna səbəb isə məhkum Elşad Babayevin karsda (cəza kamerası) işgəncə ilə öldürülməsi olub. Öldürülən məhkumun yaxınlarının təqdim etdikləri fotolarda Elşad Babayevin bədəni üzərində çoxsaylı xəsarətlərin olduğu görünür. Bu hadisədən sonra 11 məhbus “tubzon”a köçürülüb.
http://www.azadliq.info/cmyyt/298-cmyyt/59382-tubzona-koecuerueln-mhkumlara-ignc-verilib.html
