Azərbaycan
Respublikasının Milli Məclisi,
Zəngin dövlətçilik ənənələrinə malik olan Azərbaycan xalqının uzu
n illərdən
bəri müstəqil dövlət quraraq azad yaşamaq kimi ülvi amallarının
gerçəkləşməsində, suveren, demokratik, hüquqi dövlətin bərqərar edilməsində,
ölkəmizin inkişafı və tərəqqisinin bünövrəsinin qoyulmasında, Avropa hüquq
məkanına inteqrasiya olunmuş müasir hüquq sisteminin formalaşmasında xalqımızın
ümummilli lideri Heydər Əliyevin misilsiz xidmətlərini ehtiramla xatırlayaraq;
ölkəmiz üçün çətin sınaqlar dövründə dövlət idarəçiliyinin sükanı arxasında
dayanan Heydər Əliyevin ardıcıl, məqsədyönlü, düşünülmüş daxili və xarici
siyasət kursuna, müstəqillik və milli dirçəliş fəlsəfi konsepsiyasına,
bütövlükdə cəmiyyətin və hər insanın firavan həyatına və yüksək rifahına
yönəlmiş siyasi xəttinə əsaslanaraq uğurla irəliləyən müstəqil Azərbaycan
Respublikasının nailiyyətlərini iftixarla vurğulayaraq;
daim ümumbəşəri idealları, insan hüquq və azadlıqlarının qorunması kimi
dəyərləri rəhbər tutan Heydər Əliyev siyasətinin humanizm, mərhəmət və
insanpərvərlik ənənələrini davam etdirərək;
qanunçuluğa və hüququn aliliyinə əsaslanan cinayət–hüquq siyasətini həyata keçirərək,
cinayətlərin xarakterini və ictimai təhlükəlilik dərəcəsini nəzərə alaraq,
cinayət törətmiş şəxslərin öz əməllərini və onların nəticələrini dərk etməklə
islah olunacaqlarına ümid edərək;
cəzadan azad etmənin tərbiyəvi əhəmiyyətinə inanaraq, cəzadan azad olunacaq
şəxslərin qanunlara dönmədən əməl etmələrini və cəmiyyətin inkişafına öz
töhfələrini vermələrini arzulayaraq, azadlığın, ədalətin və tərəqqinin
demokratik cəmiyyətin ən ümdə və zəruri şərtlərindən olduğunu qeyd edərək;
xalqımızın dahi liderinin əbədiyaşar xatirəsinin daim uca tutulması, Heydər
Əliyev siyasi irsinin tədqiq və dünya miqyasında təqdir edilməsi məqsədi ilə
tədbirlər həyata keçirən Heydər Əliyev Fondunun təşəbbüsünü dəstəkləyərək, ulu
öndərin əziz xatirəsinə həsr olunmuş aşağıdakı amnistiyanın elan edilməsini
qərara alır:
I. AMNİSTİYA TƏTBİQ EDİLƏN
ŞƏXSLƏRİN DAİRƏSİ
1. Aşağıdakı məhkumlar, bu Qərarın 6–cı bəndində nəzərdə tutulmuş məhdudiyyət
nəzərə alınmaqla, təyin olunmuş cəzalardan azad edilsin:
1.1. müəyyən müddətə azadlıqdan məhrum etmə cəzasının bu Qərar qüvvəyə mindiyi
günədək çəkilməmiş hissəsi altı aydan artıq olmayan şəxslər;
1.2. intizam xarakterli hərbi hissədə saxlama cəzasının bu Qərar qüvvəyə
mindiyi günədək çəkilməmiş hissəsi altı aydan artıq olmayan şəxslər;
1.3. azadlığın məhdudlaşdırılması cəzasının bu Qərar qüvvəyə mindiyi günədək
çəkilməmiş hissəsi bir ildən artıq olmayan şəxslər;
1.4. hərbi xidmət üzrə məhdudlaşdırma cəzasının bu Qərar qüvvəyə mindiyi
günədək çəkilməmiş hissəsi bir ildən artıq olmayan şəxslər;
1.5. islah işləri cəzasının bu Qərar qüvvəyə mindiyi günədək çəkilməmiş hissəsi
bir ildən artıq olmayan şəxslər;
1.6. ictimai işlər cəzasına məhkum edilmiş şəxslər;
1.7. əsas cəza kimi müəyyən vəzifə tutma və ya müəyyən fəaliyyətlə məşğul olma
hüququndan məhrum etmə cəzasına məhkum edilmiş şəxslər;
1.8. əsas cəza kimi cərimə cəzasına məhkum edilmiş şəxslər.
2. Bu Qərarın 1.1–ci bəndində göstərilən şəxslərdən başqa, müddətindən asılı
olmayaraq, aşağıdakı məhkumlar müəyyən müddətə azadlıqdan məhrum etmə cəzasından
azad edilsinlər (bu Qərarın 4–6–cı bəndlərində nəzərdə tutulmuş məhdudiyyətlər
nəzərə alınmaqla):
2.1. qadınlar;
2.2. cinayət törədərkən 18 yaşına çatmayan şəxslər;
2.3. bu Qərar qüvvəyə mindiyi günədək 60 yaşına çatmış kişilər;
2.4. bu Qərar qüvvəyə mindiyi günədək birinci qrup əlil sayılmış şəxslər;
2.5. öhdəsində (himayəsində) yetkinlik yaşına çatmayan övladı və ya birinci və
ya ikinci qrup əlil övladı olan kişilər, o cümlədən bu Qərarın qüvvəyə mindiyi
günədək atalığı, övladlığa götürməsi, qəyyumluğu və himayəçiliyi
qanunvericiliklə nəzərdə tutulmuş qaydada müəyyən olunmuş şəxslər;
2.6. İkinci dünya müharibəsi dövründə faşizmə qarşı döyüşlərdə iştirak etmiş,
eləcə də həmin dövrdə keçmiş SSRİ–nin Silahlı Qüvvələrində və arxa cəbhədə
xidmət etmiş və qanunvericiliklə müəyyən edilmiş qaydada bunlara bərabər
tutulan şəxslər, həmçinin bu döyüşlərdə həlak olmuş və ya xəbərsiz itkin düşmüş
şəxslərin yaxın qohumları;
2.7. Azərbaycan Respublikasının suverenliyinin və ərazi bütövlüyünün qorunması
uğrunda döyüşlərdə iştirak etmiş, Azərbaycan Respublikasının, habelə keçmiş
SSRİ–nin Silahlı Qüvvələri tərkibində beynəlmiləl borcunu yerinə yetirmiş
şəxslər, həmçinin bu döyüşlərdə həlak olmuş və ya xəbərsiz itkin düşmüş
şəxslərin yaxın qohumları;
2.8. Azərbaycan Respublikasının, habelə keçmiş SSRİ–nin orden və medalları ilə
təltif olunmuş şəxslər (qanunvericiliklə müəyyən edilmiş qaydada orden və
medallardan məhrum edilmiş şəxslər istisna olmaqla);
2.9. keçmiş SSRİ dövründə repressiyalara məruz qalmış, sonradan səlahiyyətli
orqanların qərarları ilə reabilitasiya olunmuş şəxslər və onların yaxın
qohumları;
2.10. 1948–1953 və 1988–ci illərdə etnik təmizləmə, terrorçuluq və soyqırım
siyasəti nəticəsində Ermənistandan deportasiya olunmuş şəxslər;
2.11. 1988–1993–cü illərdə Azərbaycan ərazisinin bir hissəsinin erməni silahlı
qüvvələri tərəfindən işğalı nəticəsində öz doğma torpaqlarından məcburi
köçürülmüş şəxslər;
2.12. Çernobıl qəzasının aradan qaldırılmasında iştirak etmiş və onlara
himayəçilik edən şəxslər (himayəçilik qanunvericiliklə nəzərdə tutulmuş qaydada
müəyyən olunmuşdursa);
2.13. 1990–cı il 20 Yanvar faciəsində əlil olmuş şəxslər və şəhid olmuş
şəxslərin yaxın qohumları;
2.14. Xocalı soyqırımında əlil olmuş şəxslər və şəhid olmuş şəxslərin yaxın
qohumları.
3. Bu Qərarın 1–ci bəndində göstərilən şəxslərdən başqa, aşağıdakı məhkumlar
təyin olunmuş cəzalardan azad edilsin (bu Qərarın 4–6–cı bəndlərində nəzərdə
tutulmuş məhdudiyyətlər nəzərə alınmaqla):
3.1. intizam xarakterli hərbi hissədə saxlama cəzasına məhkum edilmiş şəxslər;
3.2. azadlığın məhdudlaşdırılması cəzasına məhkum edilmiş şəxslər;
3.3. hərbi xidmət üzrə məhdudlaşdırma cəzasına məhkum edilmiş şəxslər;
3.4. islah işləri cəzasına məhkum edilmiş şəxslər;
3.5. şərti məhkum edilmiş şəxslər;
3.6. cəzasının çəkilməsi təxirə salınmış şəxslər;
3.7. cəzadan şərti olaraq vaxtından əvvəl azad edilmiş şəxslər.
II. AMNİSTİYANIN TƏTBİQİNƏ
MƏHDUDİYYƏTLƏR
4. Bu Qərarın 2 və 3–cü bəndləri aşağıdakı şəxslər barəsində tətbiq edilməsin:
4.1. Azərbaycan Respublikasının Cinayət Məcəlləsinin 15.4 və 15.5–ci
maddələrində nəzərdə tutulmuş ağır və xüsusilə ağır cinayətlərə, həmçinin
Cinayət Məcəlləsinin 101, 115.1, 119.1, 122, 124.2, 125, 133.1, 133.2, 136.3,
137, 138.2–138.4, 139.2, 140.1, 140.2, 140.4, 141.4, 144–2.2, 145.1, 145.2, 146.1,
146.2, 147.2, 150.1, 151, 152, 159.4, 162.2, 170.1, 170.2, 171.1, 172, 177.2,
178.2, 179.2, 182.1, 184.3, 185.2, 186.2, 192.2, 193.2, 193–1.1, 194.2, 196.2,
199.3, 200.3, 200.4, 201.2, 204.1, 205, 206.1, 206.2, 208, 213.4, 220.2, 221.2,
221.3, 222–1.2, 222–2.2, 223.2, 224, 224–1, 224–2, 225.2, 227.1, 227.2, 228.1,
228.2, 229.1, 229.2, 231, 232.1, 233–1.1, 234.1–234.3, 235.1, 235.2, 236.1,
237.1, 238.1, 239, 240.1, 240.2, 243–245, 247, 248.2, 250.3, 251.3, 252.3,
254.3, 256.3, 258.3, 260.2, 263.2, 267.3, 271.2, 272.2, 281.1, 283–285, 286.3,
288.1–288.3, 290, 291, 292.1, 292.2, 293.1, 294, 295.1, 296.2, 297.2,
299.2–299.4, 301.2, 302, 304, 306, 307.3, 309.2, 312.1, 312–1, 314.2, 315,
316.2, 316–1.3, 317.1, 317.2, 318.2, 319.2, 320.1, 321.2, 323, 324, 328.2,
330.2, 331.3, 332.2, 333.5, 335.2, 336, 338.2, 339.2, 340.2, 341, 342.2, 344.1,
346.1, 349 və 350.2–ci maddələrində, habelə "Terrorizmin maliyyələşdirilməsi
ilə mübarizə haqqında Beynəlxalq Konvensiyaya Azərbaycan Respublikasının
qoşulması barədə” Azərbaycan Respublikası Qanununun tətbiqi ilə əlaqədar
Azərbaycan Respublikasının bəzi qanunvericilik aktlarına dəyişikliklər və
əlavələr edilməsi haqqında” 2002–ci il 17 may tarixli 332–IIQD nömrəli və
"Korrupsiyaya qarşı mübarizə ilə əlaqədar Azərbaycan Respublikasının bəzi
qanunvericilik aktlarına əlavələr və dəyişikliklər edilməsi haqqında” 2006–cı
il 7 aprel tarixli 92–IIIQD nömrəli Azərbaycan Respublikasının qanunları ilə
sanksiyaları ağırlaşdırılanadək Cinayət Məcəlləsinin 216, 308.2, 311.3–cü
maddələrində nəzərdə tutulmuş cinayətlərə görə məhkum olunmuş şəxslər;
4.2. "Azərbaycan Respublikasının bəzi qanunvericilik aktlarına əlavələr və
dəyişiklik edilməsi haqqında” 2005–ci il 30 sentyabr tarixli 1020–IIQD nömrəli
və "Korrupsiyaya qarşı mübarizə ilə əlaqədar Azərbaycan Respublikasının bəzi
qanunvericilik aktlarına əlavələr və dəyişikliklər edilməsi haqqında” 2006–cı
il 7 aprel tarixli 92–IIIQD nömrəli Azərbaycan Respublikasının qanunları ilə
Cinayət Məcəlləsindən çıxarılmış 173 və 241–ci maddələrində nəzərdə tutulmuş
cinayətlərə görə məhkum olunmuş şəxslər;
4.3. 2000–ci il sentyabrın 1–dək qüvvədə olmuş Azərbaycan Respublikası Cinayət
Məcəlləsinin 7–1–ci maddəsində nəzərdə tutulmuş ağır cinayətlərə, habelə həmin
Məcəllənin 69, 93–5–ci maddəsinin birinci hissəsi, 93–6–cı maddəsinin birinci
hissəsi, 93–9–cu maddəsinin ikinci hissəsi, 100–cü maddəsinin birinci hissəsi,
113–cü maddəsinin ikinci hissəsi, 114–cü maddəsinin dördüncü hissəsi, 120, 126,
171–ci maddəsinin birinci hissəsi, 178–ci maddəsinin ikinci hissəsi, 185,
208–ci maddəsinin ikinci və üçüncü hissələri, 220–ci maddəsinin birinci və
üçüncü hissələri, 226–1–ci maddəsinin ikinci hissəsi, 229–cu maddəsinin birinci
hissəsi, 241–ci maddəsinin "q” bəndi və 255–1–ci maddəsinin "v” və "q”
bəndlərində nəzərdə tutulmuş cinayətlərə görə məhkum olunmuş şəxslər;
4.4. "Qanunvericiliyin təkmilləşdirilməsi məqsədi ilə Azərbaycan
Respublikasının Cinayət Məcəlləsinə və digər məcəllələrinə dəyişikliklər və
əlavələr edilməsi haqqında” 1998–ci il 7 aprel tarixli 463–IQD nömrəli
Azərbaycan Respublikasının Qanunu ilə Cinayət Məcəlləsindən çıxarılmış 83–cü
maddəsinin üçüncü və dördüncü hissələri, 88, 88–1, 91–ci maddəsinin ikinci və
üçüncü hissələri, 143–cü maddəsinin üçüncü və dördüncü hissələri, 145, 147–ci
maddəsinin üçüncü hissəsi, həmçinin "Azərbaycan Respublikasının Cinayət
Məcəlləsinə bəzi dəyişikliklər edilməsi haqqında” 1996–cı il 29 may tarixli
90–İQD nömrəli Azərbaycan Respublikasının Qanunu ilə Cinayət Məcəlləsindən
çıxarılmış 60 və 65–ci maddələrlə məhkum olunmuş şəxslər;
4.5. qəsdən törədilmiş cinayətlər üzrə ümumi miqdarı şərti maliyyə vahidi
məbləğinin əlli min mislindən artıq olan məbləğdə ziyan vurmuş şəxslər;
4.6. maddi ziyanı tam ödəməmiş şəxslər;
4.7. xüsusilə təhlükəli residiv yaradan cinayətlərə görə məhkum olunmuş və ya
2000–ci il sentyabrın 1–dək qüvvədə olmuş Azərbaycan Respublikası Cinayət
Məcəlləsinə əsasən xüsusi təhlükəli residivist hesab olunmuş şəxslər;
4.8. qəsdən cinayət törətdiyinə görə əvvəllər cəzaçəkmə müəssisələrində
azadlıqdan məhrum etmə cəzasını çəkmiş və yenidən qəsdən cinayət törətmiş
şəxslər (qanunvericiliklə nəzərdə tutulmuş qaydada götürülmüş və ya ödənilmiş
məhkumluqlar nəzərə alınmamalıdır);
4.9. 1991–ci il oktyabrın 18–dən sonra amnistiya və ya əfvetmə aktları ilə
cəzaçəkmə müəssisələrində azadlıqdan məhrum etmə cəzasını çəkməkdən azad
olunmuş və yenidən qəsdən cinayət törətmiş şəxslər;
4.10. cəzaçəkmə müəssisələrində, intizam xarakterli hərbi hissədə və ya xüsusi
müəssisələrdə cəza çəkərkən qəsdən cinayət törətmiş şəxslər.
5. Bir neçə cinayətə görə məhkum edilmiş şəxslərin törətdiyi cinayətlərdən biri
bu Qərarın təsiri altına düşmürsə, bu Qərarın 2 və 3–cü bəndlərində göstərilən
şəxslərə amnistiya tətbiq edilmir.
6. "Amnistiya aktlarının tətbiqinin məhdudlaşdırılması haqqında” 1994–cü il 24
fevral tarixli, 793 nömrəli Azərbaycan Respublikası Qanununda nəzərdə tutulmuş
şəxslər barəsində amnistiya tətbiq edilmir.
III. AMNİSTİYANIN TƏTBİQİ
QAYDALARI
7. Amnistiya bu Qərar qüvvəyə mindiyi günədək qüvvəyə minmiş ittiham hökmləri
ilə məhkum edilmiş şəxslər barəsində tətbiq edilir.
8. Amnistiya aşağıdakı orqanlar tərəfindən tətbiq edilir:
8.1. cəzaçəkmə müəssisələri – bu Qərarın 1.1 və 2–ci bəndlərində nəzərdə
tutulan şəxslər barəsində;
8.2. xüsusi müəssisələr – bu Qərarın 1.3 və 3.2–ci bəndlərində nəzərdə tutulan
şəxslər barəsində;
8.3. intizam xarakterli hərbi hissənin və hərbi hissələrin komandanlığı –
müvafiq olaraq bu Qərarın 1.2, 3.1 və 1.4, 3.3–cü bəndlərində nəzərdə tutulan
şəxslər barəsində;
8.4. məhkəmə icraçıları – bu Qərarın 1.5–1.8 və 3.4–cü bəndlərində nəzərdə
tutulan şəxslər barəsində;
8.5. məhkəmələr – bu Qərarın 3.5–3.7–ci bəndlərində nəzərdə tutulan şəxslər
barəsində.
9. Bu Qərarın 8.1–8.4–cü bəndlərində nəzərdə tutulmuş orqanlar amnistiya tətbiq
edərkən Azərbaycan Respublikası Cinayət–Prosessual Məcəlləsində nəzərdə
tutulmuş qaydalara riayət etməklə, qərarları müvafiq prokurorlarla
razılaşdırmalıdırlar.
10. Bu Qərarın 3.5–3.7–ci bəndlərində nəzərdə tutulan şəxslər barəsində
amnistiyanın tətbiq edilməsi məsələsinə həmin məhkumların üzərində nəzarəti
həyata keçirən orqanların müraciəti əsasında məhkumun yaşayış yeri üzrə
məhkəmələr tərəfindən baxılır. Həmin müraciətlərə baxarkən məhkəmələr
Azərbaycan Respublikasının Cinayət–Prosessual Məcəlləsində hökm və ya
məhkəmənin digər yekun qərarlarının icrası qaydasında icraat üçün nəzərdə
tutulmuş tələblərə riayət etməli, məhkəmə iclasında prokurorun iştirakı təmin
edilməlidir.
11. Azərbaycan Respublikası Cinayət–Prosessual Məcəlləsinin 515.2–ci maddəsinə
müvafiq olaraq, amnistiya aktının tətbiq edilməməsi və ya düzgün tətbiq
edilməməsi haqqında məhkumun ərizəsinə cəzanı icra edən orqanın mülahizəsi
nəzərə alınmaqla, cəzanın çəkildiyi yer üzrə birinci instansiya məhkəməsi
tərəfindən baxılır.
12. Bu Qərar onun təsiri altına düşən hər bir şəxs barəsində ayrı–ayrılıqda
tətbiq edilir.
13. Amnistiya tətbiq edilərkən məhkumun şəxsi işi öyrənilməli və amnistiyanın
tətbiqi məsələlərinin həlli üçün zəruri sənədlər göstərilən qərara əlavə
edilməlidir. Amnistiyanı tətbiq edən orqanlar amnistiyanın tətbiqi barədə qərar
qəbul edilməsi üçün zəruri sənədləri müvafiq orqanlardan tələb etməyə
haqlıdırlar. Bu sorğular dərhal icra edilməlidir.
14. Amnistiya tətbiq edilən alkoqolizmdən, narkomaniyadan və ya zöhrəvi
xəstəliklərdən müalicə təyin olunmuş şəxslər barəsində materiallara bu Qərarın
20–ci bəndində nəzərdə tutulmuş müddətdə baxılmalı, həmin şəxslərin cəzadan
azad edilməsi məsələsi isə müalicə başa çatdıqdan sonra həll edilməlidir
(şəxsin zöhrəvi xəstəliklərdən müalicəsini qurtarmasının təsdiqi üçün əsas –
tibbi rəy, məhkəmənin alkoqolizmdən və ya narkomaniyadan məcburi müalicə təyin
etdiyi şəxslər barəsində əsas isə məcburi müalicənin ləğvi barədə məhkəmənin
qərarıdır).
15. Bu Qərarın 4.10 və 8.2–ci bəndlərində göstərilən "xüsusi müəssisələr”
dedikdə, qanunvericiliyə uyğun olaraq azadlığın məhdudlaşdırılması növündə
cəzanın çəkildiyi yerlər, bu Qərarın 8.3–cü bəndində göstərilən "hərbi
hissələr” dedikdə, hərbi xidmət üzrə məhdudlaşdırma növündə cəzanın çəkildiyi
yerlər, bu Qərarın 10–cu bəndində göstərilən "məhkumların üzərində nəzarəti
həyata keçirən orqanlar” dedikdə isə, şərti məhkum edilmiş, cəzadan şərti
olaraq vaxtından əvvəl azad edilmiş və cəzasının çəkilməsi təxirə salınmış
şəxslər üzərində nəzarəti həyata keçirən məhkəmə icraçıları və hərbi hissələrin
və ya müəssisələrin komandanlığı başa düşülür.
16. Bu Qərarın 1–ci bəndində nəzərdə tutulmuş şəxslər barəsində amnistiyanın
tətbiq edilməsi, onları törətdikləri cinayət nəticəsində vurulmuş ziyanı
ödəməkdən azad etmir.
17. Əvvəllər amnistiya və ya əfvetmə aktları ilə cəzasının müddəti azaldılmış
şəxslərə bu Qərar tətbiq edilərkən, onların cəzasının çəkilməmiş müddətləri
həmin aktlar nəzərə alınmaqla hesablanır.
18. Barələrində amnistiya tətbiq olunmuş çağırışçıların və hərbi qulluqçuların
müvafiq olaraq həqiqi hərbi xidmətə çağırış və hərbi xidmət məsələləri
qanunvericiliklə müəyyən edilmiş qaydada həll edilir.
19. Bu Qərar başqa dövlətlərin məhkəmələri tərəfindən məhkum edilmiş və
cəzasını Azərbaycan Respublikasında çəkən şəxslərə də şamil edilir.
20. Bu Qərar qüvvəyə mindiyi gündən üç ay müddətində tətbiq edilir.
21. Bu Qərar dərc olunduğu gündən qüvvəyə minir.
Oqtay ƏSƏDOV,
Azərbaycan Respublikası
Milli Məclisinin sədri.
Bakı şəhəri, 8 may 2007–ci il.