Azərbaycan Respublikası Daxili
İşlər Nazirliyinin istintaq təcridxanalarının Azərbaycan Respublikasının
Ədliyyə Nazirliyinin tərkibinə verilməsi haqqında
AZƏRBAYCAN RESPUBLİKASI PREZİDENTİNİN FƏRMANI
Azərbaycan
Respublikasında vahid islah-əmək siyasətinin həyata keçirilməsi və istintaq
təcridxanalarının fəaliyyətinin Avropa Şurasının standartlarına
uyğunlaşdırılması məqsədilə qərara alıram:
1. Azərbaycan
Respublikası Daxili İşlər Nazirliyinin Bakı şəhərində yerləşən 1 və 3 saylı,
Gəncə şəhərində yerləşən 2 saylı istintaq təcridxanaları 1999-cu il noyabrın
1-dək bütün ştat vahidləri və balanslarında olan əmlakla birlikdə Azərbaycan
Respublikası Ədliyyə Nazirliyinin tərkibinə verilsin.
2. Bu Fərmanın
1-ci bəndində göstərilən istintaq təcridxanalarının sıravi və rəis heyəti əmək
haqqları saxlanılmaqla ədliyyə orqanları işçiləri adlandırılsın və bu heyətin
statusu (rütbə, xidmət illəri və s.) müvafiq olaraq Azərbaycan Respublikasının
Daxili İşlər Nazirliyinin sıravi və rəis heyətinin statusuna bərabər tutulsun.
3. Azərbaycan
Respublikasının Nazirlər Kabinetinə tapşırılsın ki, iki ay müddətində:
bu Fərmanla
əlaqədar Azərbaycan Respublikasının qanunvericilik aktlarına dəyişikliklər və
əlavələr edilməsinə dair müvafiq qanun layihəsini Azərbaycan Respublikasının
Prezidentinə təqdim etsin;
bu Fərmandan
irəli gələn digər məsələləri həll etsin.
4. Azərbaycan
Respublikasının Ədliyyə Nazirliyinə tapşırılsın ki, bir ay müddətində:
istintaq
təcridxanalarının Əsasnaməsini və səlahiyyəti daxilində müvafiq normativ hüquqi
aktları hazırlayıb təsdiq etsin;
bu Fərmandan
irəli gələn digər məsələləri həll etsin.
5. Bu Fərman
imzalandığı gündən qüvvəyə minir.
Azərbaycan Respublikasının Prezidenti HEYDƏR ƏLİYEV
Bakı şəhəri, 9 oktyabr 1999-cu il
№ 195
|