İslah-əmək müəssisələrində və istintaq
təcridxanalarında qanunçuluğun möhkəmləndirilməsi, cəzaların icrası
qaydalarının təmin edilməsi və hüquqi islahatların həyata keçirilməsinə dair
tədbirlər haqqında
AZƏRBAYCAN RESPUBLİKASI PREZİDENTİNİN FƏRMANI
Azərbaycan Respublikası Ədliyyə Nazirliyi Məhkəmə Qərarlarının İcrası Baş
İdarəsinin Bakı şəhəri Qarabağ rayonunun Qobustan qəsəbəsində yerləşən
həbsxanasında baş verən son hadisələr göstərir ki, düşmən qüvvələrə xidmət edən
ayrı-ayrı şəxslər və terrorçu qruplar cinayət məsuliyyətinə cəlb edilərək cəza
çəkdikləri dövrdə də ölkədə sabitliyin və ictimai təhlükəsizliyin pozulmasına,
Azərbaycanın müstəqilliyinə qarşı yönəldilən cinayətkar əməllərindən əl
çəkməmişlər.
1999-cu il yanvarın 7-8-də xüsusi təhlükəli dövləti və digər ağır
cinayətlər törətdiklərinə görə cəza çəkən Vahid Musayev, Faiq Baxşəliyev, Yaşar
Məmmədov, Vəliəhəd İbadov və bir qrup digər məhkumlar Qobustan qəsəbəsində
yerləşən həbsxanadan qaçmaq məqsədi ilə xidmət heyətinə zorakılıq göstərməklə nəzarət-buraxılış
məntəqəsinə, mühafizə-rejim postlarına, qarovul xidmətinə basqın edib, silah və
döyüş sursatı ələ keçirərək mühafizə sistemini, rabitə və mühəndis-texniki
qurğuları dağıtmış, 28 hərbi qulluqçu və nəzarətçini girov götürmüş, cəza çəkən
digər məhkumları itaətsizliyə təhrik etmişlər.
Terrorçular odlu silahlardan atəş açıb hərbi qulluqçuların həyatına
sui-qəsd edərək, onların bir neçəsinə ağır dərəcəli bədən xəsarətləri yetirmiş,
girov götürülən şəxsləri əzab və işgəncələrə məruz qoymuşlar.
Hadisənin ağır nəticələrinin və insan tələfatının qarşısını almaq məqsədi
ilə terrorçularla danışıqlar aparılmasına və bütün mümkün tədbirlərin
görülməsinə baxmayaraq onlar öz cinayətkar hərəkətlərini davam etdirmiş,
hakimiyyət orqanları qarşısında bir sıra qanunsuz tələblər qoymuşlar.
Girovların azad olunması və təhlükəli cinayətkarların tərksilah edilməsi
məqsədi ilə qanunvericilikdə nəzərdə tutulmuş xüsusi əməliyyat tədbiri
keçirilərək terrorçular zərərsizləşdirilmiş, onlardan 11 nəfəri silahlı
müqavimət göstərərkən öldürülmüşdür.
Xidməti vəzifələrini yerinə yetirən 2 hərbi qulluqçu həlak olmuş, 25 nəfəri
isə müxtəlif dərəcəli bədən xəsarətləri almışdır.
Hadisə ilə əlaqədar cinayət işi başlanmış və istintaq aparılır.
Baş vermiş bu ağır cinayət islah-əmək müəssisələri sistemində aparılan
islahatlara və görülən tədbirlərə baxmayaraq bir sıra problemlərin mövcud
olduğunu təsdiq edir.
Belə ki, son illər islah-əmək müəssisələrinin və istintaq təcridxanalarının
mühafizə-rejim qaydaları möhkəmləndirilmiş, təhlükəsizlik vasitə və sistemləri
təkmilləşdirilmişdir. Eyni zamanda islah-əmək qanunvericiliyi beynəlxalq
standartlara uyğun humanistləşdirilmiş, həbsdə olanların və cəza çəkən
məhkumların saxlanılması şəraiti, onların islah və tərbiyə olunması üçün
mənəvi-psixoloji mühit xeyli yaxşılaşmış, cəza çəkmə yerlərində və istintaq
təcridxanalarında sosial-məişət və tibbi-sanitariya məsələlərinə diqqət
artırılmış, imtiyazların dairəsi genişləndirilmişdir.
Lakin islah-əmək müəssisələrinin və digər cəza çəkmə yerlərinin mühafizəsində,
rejim və daxili intizam qaydalarına, məxfiliyə əməl edilməsində, əməliyyat
işinin aparılmasında, mühafizəni həyata keçirən hərbi hissələrin
komplektləşdirilməsində, hərbçilərin döyüş, fiziki, mənəvi-psixoloji
hazırlığında hələ də ciddi nöqsanlar mövcuddur. Bununla yanaşı islah-əmək
müəssisələrinin və istintaq təcridxanalarının maddi-texniki təchizatında, bu
müəssisələrin əməkdaşlarının sosial müdafiəsi məsələlərinin həllində də
çatışmazlıqlar vardır.
Bütün bunları nəzərə alaraq islah-əmək müəssisələrinin və istintaq
təcridxanalarının fəaliyyətindəki nöqsan və çatışmazlıqların aradan
qaldırılması, cəzaların icrası ilə əlaqədar qanunvericiliyin tələblərinə ciddi
riayət edilməsi, cəza çəkmə yerlərinin mühafizəsini həyata keçirən hərbi
hissələrin gücləndirilməsi və bu sahədə islahatların sürətləndirilməsi məqsədi
ilə qərara alıram:
1. İslah-əmək müəssisələrinin və istintaq təcridxanalarının işinin
təkmilləşdirilməsi sahəsində kompleks tədbirlərin həyata keçirilməsi üçün
Azərbaycan Respublikası Prezidentinin yanında aşağıdakı tərkibdə komissiya
yaradılsın:
Komissiyanın sədri:
Artur Rasizadə -
Azərbaycan Respublikasının Baş naziri
Komissiyanın üzvləri:
Ramiz Mehdiyev -
Azərbaycan Respublikası Prezidentinin İcra Aparatının rəhbəri
Südabə Həsənova -
Azərbaycan Respublikasının ədliyyə naziri
Eldar Həsənov -
Azərbaycan Respublikasının Baş prokuroru
Ramil Usubov -
Azərbaycan Respublikasının daxili işlər naziri
Namiq Abbasov -
Azərbaycan Respublikasının milli təhlükəsizlik naziri
Səfər Əbiyev -
Azərbaycan Respublikasının müdafiə naziri
Fuad Ələsgərov -
Azərbaycan Respublikası Prezidentinin İcra Aparatının Hüquq mühafizə orqanları
ilə iş şöbəsinin müdiri
Elman Qənbərov -
Azərbaycan Respublikası Hərbi Əks-kəşfiyyat Xidmətinin rəisi
Aydın Qasımov -
Azərbaycan Respublikası ədliyyə nazirinin müavini, Məhkəmə Qərarlarının İcrası
Baş İdarəsinin rəisi
2. Komissiyaya tapşırılsın ki:
islah-əmək müəssisələrində və istintaq təcridxanalarında qanunvericilik,
təşkilati və digər məsələləri nəzərdə tutan tədbirlər proqramı hazırlayıb bir
ay müddətində Azərbaycan Respublikasının Prezidentinə təqdim etsin;
islah-əmək müəssisələrinin və istintaq təcridxanalarının beynəlxalq
standartlara uyğun təşkili və fəaliyyətinin təmin edilməsi üçün onların
maddi-texniki bazasının möhkəmləndirilməsi, müasir nəzarət, mühafizə,
mühəndis-texniki qurğularla və digər xüsusi vasitələrlə təchiz olunması üçün
zəruri təbirlər görsün və Azərbaycan Respublikasının Prezidentinə məlumat
versin;
islah-əmək müəssisələri və istintaq təcridxanaları əməkdaşlarının sosial
müdafiəsinin yaxşılaşdırılması, onların əmək haqqının artırılması və əlavə
ödəmələr müəyyən edilməsi üçün tədbirlər görsün və iki ay müddətində Azərbaycan
Respublikasının Prezidentinə məlumat versin;
cəza çəkmə yerlərində məhkumların saxlanılması şəraitinin daha da
yaxşılaşdırılması sahəsində işləri davam etdirsin və islah-əmək müəssisələrində
istehsal sahələrinin yaradılması üçün müvafiq tədbirlər həyata keçirsin.
3. Azərbaycan Respublikasının Ədliyyə Nazirliyinə tapşırılsın ki, Bakı
şəhəri Qaradağ rayonunun Qobustan qəsəbəsində yerləşən həbsxanada terrorçuluq
hərəkətləri nəticəsində dağıdılmış rabitə və digər mühəndis-texniki qurğuların
bərpası, həbsxananın mühafizə və təhlükəsizlik sisteminin gücləndirilməsi üçün
zəruri tədbirlər görsün.
4. Azərbaycan Respublikasının Prokurorluğuna, Ədliyyə, Daxili İşlər, Milli
Təhlükəsizlik, Müdafiə Nazirliklərinə tapşırılsın ki: [1]
həbsxanada baş vermiş cinayət üzrə zəruri əməliyyat tədbirlərinin həyata
keçirilməsini, cinayət işinin tam və hərtərəfli istintaq olunub
qanunvericiliklə müəyyən olunmuş müddətdə başa çatdırılmasını təmin etsinlər;
cəza çəkmə yerlərində terrorçuluq və digər cinayət hadisələrinin qarşısının
alınması, həbsdə olan şəxslərin müşayiətinin həyata keçirilməsi üçün bu
orqanların silah, döyüş sursatı, etibarlı rabitə, nəqliyyat və digər xüsusi
vasitələrlə təchizatının yaxşılaşdırılmasını təmin etsinlər;
islah-əmək müəssisələrində və istintaq təcridxanalarında nəzarətin və
mühafizənin möhkəmləndirilməsini, bu vəzifələri həyata keçirən qurumların və
hərbi hissələrin komplektləşdirilməsini, şəxsi heyətin döyüş qabiliyyətinin,
nizam-intizamın, xidməti məsuliyyətin artırılmasını, qanunçuluğa və rejim
qaydalarına ciddi əməl olunmasını təmin etsinlər.
5. Azərbaycan Respublikasının Müdafiə, Daxili İşlər və Ədliyyə
Nazirliklərinə tapşırılsın ki, Bakı Ali Birləşmiş Komandanlıq Məktəbinə Ədliyyə
Nazirliyi Məhkəmə Qərarlarının İcrası Baş İdarəsinin Mühafizə alayı və Polis
Akademiyasında islah-əmək müəssisələri və istintaq təcridxanaları üçün ixtisaslı
kadrların hazırlanmasını təşkil etsinlər.
6. Bu Fərman imzalandığı gündən qüvvəyə minir.
Azərbaycan Respublikasının Prezidenti
HEYDƏR ƏLİYEV
Bakı şəhəri, 11 fevral 1999-cu il
№ 94
İSTİFADƏ OLUNMUŞ MƏNBƏ SƏNƏDLƏRİNİN SİYAHISI
19 aprel
2005-ci il tarixli 224 nömrəli Fərman (Azərbaycan Respublikasının
Qanunvericilik Toplusu, 2005-ci il, № 4, maddə 299)
FƏRMANA EDİLMİŞ DƏYİŞİKLİK VƏ ƏLAVƏLƏRİN SİYAHISI
[1] 19 aprel 2005-ci il tarixli 224 nömrəli Fərman
(Azərbaycan Respublikasının Qanunvericilik Toplusu, 2005-ci il, № 4, maddə
299) ilə 4-cü bəndin birinci abzasından "və Azərbaycan
Respublikasının Hərbi Əks-kəşfiyyat Xidmətinə" sözləri çıxarılmışdır.
Əvvəlki redaksiyada deyilirdi:
4. Azərbaycan
Respublikasının Prokurorluğuna, Ədliyyə, Daxili İşlər, Milli Təhlükəsizlik,
Müdafiə Nazirliklərinə və Azərbaycan Respublikasının Hərbi Əks-kəşfiyyat
Xidmətinə tapşırılsın ki:
|