AZƏRBAYCAN RESPUBLİKASI ƏDLİYYƏ NAZİRLİYİ KOLLEGİYASININ QƏRARI
Cəzanın çəkilməsinə mane olan ağır xəstəliyə düçar olmuş məhkumların tibbi şəhadətləndirilməsi qaydalarının təkmilləşdirilməsi barədə
29.11.2011-ci il №4-N
Son illər penitensiar müəssisələrdə saxlanılan şəxslərin sağlamlığının qorunması, onlara göstərilən tibbi yardımın səviyyəsinin yüksəldilməsi istiqamətində məqsədyönlü tədbirlər həyata keçirilir.
Penitensiar müəssisələr ən müasir tibbi avadanlıq və dərman pereparatları ilə təmin edilmiş, minlərlə məhkum hərtərəfli tibbi müayinədən keçirilmiş, vərəm xəstəliyinə qarşı mübarizədə zəruri preventiv tədbirlər görülmüş, bu xəstəliyə yoluxmuş məhkumlar üçün İxtisaslaşdırılmış Müalicə Müəssisəsində xüsusi laboratoriya yaradılmış, yeni müalicə korpusları istifadəyə verilmişdir.
Görülmüş işlərin nəticəsində məhkumlar arasında baş vermiş ölüm hadisələrinin, o cümlədən vərəm xəstəliyindən ölənlərin sayı ilbəil nəzərəçarpacaq dərəcədə azalmaqdadır.
Həmçinin, vərəmlə ən müasir üsullarla mübarizə işində ölkəmizin əldə etdiyi nailiyyətlər beynəlxalq aləmdə böyük maraq doğurmuşdur.
Eyni zamanda cəzanın çəkilməsinə mane olan ağır xəstəliyə düçar olmuş məhkumların tibbi müayinəsinin aparılmasına də diqqət yetirilmiş, bu sahəni tənzimləyən normativ sənəd qəbul edilmiş, həmin şəxslərin tibbi şəhadətlənidilməsini həyata keçirmək üçün nazirliyin Tibb baş idarəsində xüsusi komissiya yaradılmış, onlarla məhkum barəsində aidiyyəti rəylər verilmişdir.
Tibb baş idarəsinin fəaliyyətinin və strukturunun təkmilləşdirilməsi, onun əsasnaməsinin qəbul olunması, habelə Səhiyyə Nazirliyi tərəfindən məhkumların cəza çəkməsinə mane olan ağır xəstəliklərin yeni siyahısının təsdiq edilməsi və təcrübədən irəli gələn digər məsələlər qeyd olunan sahədə normativ bazanın təkmilləşdirilməsini zəruri edir.
Bununla bağlı "Cəzanın çəkilməsinə mane olan ağır xəstəliklərə düçar olmuş məhkumların tibbi şəhadətləndirilməsi Qaydaları”nın layihəsi hazırlanmış, sənəd nazirliyin aidiyyəti idarələrinin, habelə Ali Məhkəmə və Baş prokurorluğun təklifləri nəzərə alınmaqla təkmilləşdirilmişdir.
Layihədə məhkumların ilkin kliniki diaqnozunun müəyyənləşdirilməsi işinə aidiyyəti orqanların mütəxəssislərinin cəlb olunması, şəhadətləndirmənin aparılması müddəti, müvafiq rəy alındıqdan sonra cəzaçəkmə müəssisəsinin müdiriyyətinin hərəkəti və s. barədə mütərəqqi mexanizmlər təsbit olunmuşdur.
Eyni zamanda məhkumların tibbi şəhadətləndirilməsini və digər vəzifələri həyata keçirən Tibb baş idarəsinin Xüsusi Həkim Ekspert Komissiyası haqqında Əsasnamə layihəsi də hazırlanmışdır.
Kollegiya həmin sənədlərə baxıb onları məqbul bilir.
Göstərilənlərə, habelə "Normativ hüquqi aktlar haqqında” Konstitusiya Qanununa, Cinayət, Cinayət-Prosessual və Cəzaların İcrası məcəllələrinə və Ədliyyə Nazirliyi haqqında Əsasnaməyə uyğun olaraq Azərbaycan Respublikası Ədliyyə Nazirliyinin Kollegiyası
QƏRARA ALIR:
1. "Cəzanın çəkilməsinə mane olan ağır xəstəliklərə düçar olmuş məhkumların tibbi şəhadətləndirilməsi Qaydaları” təsdiq edilsin (Əlavə №1).
2. Bu Qaydaların Azərbaycan Respublikasının Hüquqi Aktların Dövlət Reyestrinə daxil edilməsi təmin olunsun (A.Əliyev).
3. Azərbaycan Respublikasının Səhiyyə Nazirliyi tərəfindən 26.10.2010-cu ildə təsdiq edilmiş "Məhkumların cəza çəkməsinə mane olan ağır xəstəliklərin Siyahısı” elan edilsin (Əlavə №2).
4. "Azərbaycan Respublikası Ədliyyə Nazirliyinin Tibb baş idarəsinin Xüsusi Həkim Ekspert Komissiyası haqqında Əsasnamə” təsdiq olunsun (Əlavə №3).
5. Ədliyyə Nazirliyi üzrə 2003-cü il 3 aprel tarixli, 3‑T nömrəli əmrlə təsdiq edilmiş "Psixi və sair ağır xəstəliklərə tutulmuş məhkumların şəhadətləndirilməsi və cəza çəkməkdən azad olunması üçün təqdim edilməsi Qaydası" (14.04.2003-cü il tarixli 2973 nömrəli şəhadətnamə) ləğv edilsin.